Umpama pakpak

Sengkut sumengkut-sengkut, siompat-ompat buluhta idi.
Mula enggo hot atemu mengekut, ndorok siompat tuturta idi.
21. Mbelgah laengku mbelgah laemu, ndorok siompat bubunta idi.
Mbelgah atemu mbelgah atengku, ndorok siompat tuturta idi.
22. Simada durung kupogor-ogor, otang sulangat ibabo batu.
Enggo kecca surung kono kutokor, embahken sangap ngo kono bangku.
23. Gatapku simales-males, kucucukken iruang benben.
Ulang ko turang tumangis-tangis, roh nola ngaku baremben.
24. Sanggar pe sanggar man kirang, merdugun-dugun bulung Latengku.
Mada kessa kono kuidah sikarang, pesunggul lungun ibas atengku.
25. Merdalan Tenggelling ijulun kuta, tangkulukku siperca-perca.
Mula berngin kita pejumpa, mbiar aku midah sidasa.
26. Mula meriar tanduk ni bedu, roroh ni paku lumindak-lindak.
Mula mbiar ko midah begu, roh pe aku menimbak-nimbak.
27. Mula meriar tanduk ni badak, rorohon paku lumindak-lindak.
Mula mbiar ke midah bapanta, roh pe aku menimbak-nimbak.
28. Tik ketak-ketik, ia perbaju mbara;
Naing kugettuk cituk, mbiar aku midah bapana.
29. Gatap tanoh merdahan-dahan,dalan Cikaok mahan bellusen
Mula mpestep kessa siangan-angan, dalan ndaoh tulus-tulusen.
30. Sige-sige Cengceng, urat ni Mbaliang;
Ise kene turang, simeranak ni biang.
31. Merkuda-kuda Tanggiang, merlanja-lanja page;
Mersikkola kin poda sidaging, tammat kin poda harga kade.
32. Kade niembah ndene i, deddak nakan babi;
Kade mo sini dahi ndene i, oda kubettoh kami.
33. Lae sideang-deang, perkas pelian mencaliti;
Rupamu turang bage neam-neam, soramu pe mparas gati.
34. Kade lem-lem pagemu, pucuk bincoli kabir-kabiren. Kade kelleng atemu, anak maholi abing-abingen.
35. Kabang perrik, seggep bakat;
Ulang aku gerrit, nggamang kuakap.
36. Kabang perrik simengkat-engkat, seggep igual-gual;
Nakan ndene pe turang simatah mekat, ipe sinijual-jual.
37. Tokkok siohor-ohor, kain panjang ibabo ganjela;
Rokok poda tertokor, laus mertandang pe nggo mela.
38. Randat rundut, kettang petali-tali;
Tang rarat ukur, asa ulang mada dapetten cinari.
39. Ndates delleng si Raja, i terruhna si Lae Langge;
Ndates ngo berita ni Bapa, ulang kene mak merkelleng ate.
40. Ndates delleng si Raja, keparenna Sirpang Puge;
Ndates ngo berita ni Bapa, ulang kene merkata mbue.
41. Ndates pe delleng Raja, ndatesen deng ngo delleng Sidarne;
Kumarna kinincor ni Bapa, malauah sini dok ni ate.
42. Ndates delleng Sindeka, iterruhna Mbinangaboang;
Enggo kita merdeka, karina mo kita meroang-oang.
43. Ndates delleng Pinantar, ndatessen deng delleng si Gambir;
Ibaing kinincor inang, itahanken ngo merdea gambir.
44. Nggeut ngo aku membayu, salahna nola bayun ndilo;
Nggeut ngo nemmu aku bamu, salahna nola mertutur bayo.
45. Mpenter batang ni kayu, kempabana petali-tali;
Cender aku isenda, lebben katangku mersintabi.
46. Jabi-jabi kayu rintua, Lae Leam dalan Sibande;
Sentabi bai karina partua, meddem kami lebbe.
47. Ndabuh rimo Mungkur, itinggang rimo Kajaren;
Kene partua singgeddang ukur, kami enda anak ajaren.
48. Palingku ngo mbacangku, merbuah dahan parira;
Bagimo lebbe katangku, njuah-njuah kita karina.
49. Bakunem aku kipudung, perbantoen kidah karina;
Bakunem aku menungkun, perbayoen kidah karina.
50. Perbantoen kuta parira, dahanna lako kipudung;
Perbayoen kunu karina, asalmo lako surung.
51. Bakune mo aku kipalang, kipalang i rebbe-rebben;
Bakune mo kunu ate menjalang, enggo kin ngo kalak lebben.
52. Eket-eket cipakomu, galuh sirumah galuh sileuh;
Mengenget-engetpekilakomu, gennep mi rumah mengapus elus.
53. Tungkuk galuh Sileuh, perkubangen tanoh Tinada.
Tungkuk kuapus eluh, sibakinen siso mada.
54. Merkade kene merhendem, tangis merangan-angan;
Mentas kalak nahan, idok deba simada mangan.
55. Nidok sebban, keppeken buluh
Nidok dengan, kepeken musuh.
56. Nicalang mertangke-tangke, rorohen pe mertangke-tangke
Kerna nialang merbage-bage, roh na pe merbage-bage.